Coneish ACCIÓ

ACCIO èm era agéncia publica dera Generalitat de Catalonha que facilite eth creishement des enterpreses catalanes mejançant er impuls ara innovación, era expansion internacionau e era estrategia empresariau. Damb ua equipa de 500 professionaus e 40 burèus pertot deth mon acompanham 40.000 enterpreses apuprètz cada an.

Aufrim acompanhament entà hèr projèctes de R+D, de transformacion verda e tecnologica e enes procèssi d’internacionalizacion e dubertura de filiaus en estrangèr. Tanben èm responsables d’atrèir inversion estrangèra a Catalonha, a trauès der airau Catalonia Trade & Investment, e de contribuïr a qu’es enterpreses genèren un impacte positiu en entorn.

Entà arténher toti aguesti objectius, compdam damb ua equipa expèrta e multidisciplinària, tant ena sedença de Barcelona coma enes ueit delegacions ena rèsta de Catalonha, que refortís era nòsta vocacion de servici e de proximitat ara enterpresa, e convertís era agéncia en un referent en impuls dera competitivitat deth teishut empresariau catalan.

ACCIÓ se constituïc formaument eth 2010, dempús dera fusion deth Consòrci de Promocion Comerciau de Catalonha (COPCA) e deth Centre d’Innovacion e Desvolopament Empresariau (CIDEM), e toti amassa somen 40 ans de supòrt dera Generalitat de Catalonha ara enterpresa. Collaboram damb entitats empresariaus locaus e internacionaus entà somar sinergies e arténher qu’era enterpresa catalana dispause d’un ventalh mès ample d’airines entà créisher e èster mès competitiva.

ACCIÓ da sosten a mès de 38.400 enterpreses e entitats de manèra annau e les acompanhe en mès de 21.300 projèctes damb er objectiu d’enfortir era competitivitat dera economia catalana. A trauès des diferenti programes e servicis, pendent eth 2024 s’a mobilizat un investiment de mès de 2.400 milions d’euros per part d’enterpreses catalanes.

Quini son e qué representen aguesti programes e servicis?

A trauès deth hilat de Burèus de Comèrç e d‘Investiments d‘ACCIÓ se gerissen mès de 2.000 projèctes entà acompanhar es enterpreses catalanes ena sua gessuda as mercats exteriors. Ath delà de consolidar era sua preséncia internacionau o de facilitar era implantacion en exterior, es burèus permeten trobar naui sòcis o provedidors tecnologics entà amiar a tèrme projèctes d’R+D, entà desvolopar naui productes o servicis o entà exportar era tecnologia pròpria.

En encastre deth negòci internacionau s’an mobilizat 455 milions d’euros en exportacions, a trauès de projèctes geridi per ACCIÓ, qu’an permetut era creacion de mès de 1.370 lòcs de trabalh en Catalonha. En totau, s’an assessorat 960 enterpreses en matèria d’internacionalizacion e s’an constituït 46 naues filiaus catalanes en exterior damb eth supòrt des ajudes ara Multilocalizacion.

Eth 2024 eth Burèu tecnic de barrères ara internacionalizacion tanben a agut un ròtle remercable: aguest hiestron unic a atengut mès de 2.000 consultes d’enterpreses que se tròben damb obstacles o dobtes pendent es sòns procèssi de gessuda ar exterior.

Deth sòn costat, es Burèus Exteriors d’ACCIÓ an gerit mès de 2.000 projèctes entà acompanhar es enterpreses catalanes a hèr negòcis en estrangèr.

En aguest madeish encastre, e restacat damb era digitalizacion, cau soslinhar era consolidacion deth programa International eTrade en que 380 enterpreses an arrecebut assessorament o supòrt economic per tau d’profitar es canaus digitaus entà agranir es ventes internacionaus.

D’un aute costat, en encastre dera transformacion tecnologica e era disrupcion, ACCIÓ a mobilizat 418 milions d’euros d’investiment en R+D privada. Egaument, s’a dat sosten ara realizacion de projèctes collaboratius en R+D e en tot jogar era carta deth transferiment de coneishença entre enterpreses, centres tecnologics, universitats e auti agents dera innovacion. Ath delà, tanben s’a facilitat er accès des pimes ara innovacion o s’an acompanhat startups pendent eth sòn procès de creishement, consolidacion e internacionalizacion.

Damb er objectiu de hèr tèsta es granes escomeses actuaus dera digitalizacion e era sostenibilitat, ACCIÓ a dat continuitat as programes d’Innovacion digitau auançada e d’Innovacion verda.

Justament, aguestes son es dus escomeses principaus que guiden es politiques des Hons Next Generation EU. Dempús dera dubertura deth Burèu Next Generation EU, tà finaus deth 2021, s’an assessorat mès de 2.500 enterpreses catalanes entà accedir as sues convocacions.

Un aute des mecanismes qu'ACCIÓ met a dispausicion des enterpreses entà melhorar era sua competitivitat son es clusters. Actuaument, eth programa programa Catalonha Clusters compde damb 27 clusters associadi, amasse 3.000 enterpreses e some 80.000 milions d’euros de facturacion agregada.

Fin finau, per çò qu’ei dera atraccion d’investiment estrangèr, eth 2024 se materializèren 106 projèctes que mobilizèren era chifra recòrd de 1.051 milions d’euros e contribuïren ara creacion de 5.000 naui lòcs de trabalh apuprètz.